មានដឹងអត់ថា កីឡាករអង់គ្លេស ពេលប្រកួតតំណាងឲ្យជម្រើសជាតិម្តងៗទទួលបានប្រាក់កម្រៃប៉ុន្មានក្នុងមួយប្រកួត?

អង់គ្លេស៖ ក្រុមជម្រើសជាតិអង់គ្លេសកំពុងតែធ្វើការប្រកួតប្រជែងក្នុងពានរង្វាន់ Euro 2024 នារដូវក្តៅនេះដោយសង្ឃឹមថានឹង អាចឈ្នះពានរង្វាន់ធំជាលើកដំបូងរបស់ពួកគេចាប់តាំងពីការឈ្នះពានរង្វាន់ចុងក្រោយ គឺពានរង្វាន់ World Cup កាលពី ៥៨ឆ្នាំមុន។

ជាការពិតណាស់ ទោះបីជាអង់គ្លេស ចាប់ផ្តើមមិនសូវមិនបានល្អក្នុងព្រឹត្តិការណ៍ EURO តាមរយៈការប្រកួត ៣ដងក្នុងពូល ពួកគេឈ្នះម្តង និង ស្មើពីរដង រកបានតែ ២គ្រាប់ប៉ុណ្ណោះ ប៉ុន្តែ យ៉ាងណាពួកគេនៅតែអាចបញ្ចប់ចំណាត់ថ្នាក់លេខ១ កក់កៅអីឡើងទៅកាន់វគ្គ ១៦ក្រុមចុងក្រោយ ខណៈបើនិយាយពីសម្ពាធវិញ កីឡាករ និង គ្រូបង្គោល កំពុងតែត្រូវថ្មោងខ្លាំងមែនទែនពីសំណាក់អ្នកគាំទ្រ។

និយាយពីក្រុមអង់គ្លេស អ្នកណាៗក៏ទទួលស្គាល់ដែរ ថា ពួកគេមានធនធានកីឡាករច្រើនណាស់ និង ពេញសាច់តាំងពីក្រោមដល់លើ ប៉ុន្តែ ប្រិយមិត្តមានដឹងអត់ពីកម្រៃរបស់ពួកគេពេលជាប់ក្នុងក្រុមជម្រើសជាតិ និង ប្រកួតតំណាងម្តងៗ គឺ ទទួលបានប្រមាណជា ២០០០ផោន/ប្រកួត (ឬប្រមាណជា ២៥០០ដុល្លារអាមេរិក) យ៉ាងណា គិតចាប់តាំងពីឆ្នាំ ២០០៧ កីឡាករទាំងអស់តែងតែយកប្រាក់នោះទៅបរិច្ចាគទៅដល់មូលនិធិបាល់ទាត់អង់គ្លេស គិតមកទល់ពេលនេះបានចំនួនជាង ១៥លានផោន ហើយ ខណៈ បើក្នុងពានរង្វាន់ EURO នេះ ក្រុមអង់គ្លេស អាចឡើងបានដល់វគ្គផ្តាច់ព្រ័ត្រ នោះកីឡាករម្នាក់ៗនឹងទទួលបានកម្រៃសរុបចំនួន ១៤០០០ ផោន៕

ប្រភព៖ metro