គ្រាប់ពេជ្រ Vinicius ប្រើបច្ចេកទេសស៊ុត ២ គ្រាប់យ៉ាងអស្ចារ្យ ជួយឱ្យ ប្រេស៊ីល លត់ បារ៉ាហ្គាយ ទាំងព្រលឹម ៤-១(មានវីដេអូ)

បរទេស៖ នាព្រឹកថ្ងៃទី ២៩ ខែ មិថុនា ឆ្នាំ ២០២៤ នេះក្រុមជម្រើសជាតិ ប្រេស៊ីល បានជួបតទល់គ្នាជាមួយក្រុមជម្រើសជាតិ ប៉ារ៉ាហ្គាយ នៅកីឡដ្ឋាន Allegiant Stadium ក្នុងប្រទេស សហរដ្ឋអាមេរិក នៅក្នុងការប្រកួតពូល D នៃពានរង្វាន់ Copa America ២០២៤ ។

ជាការពិតណាស់ នៅក្នុងការប្រកួតខាងលើ ខាងក្រុមជម្រើសជាតិ ប្រេស៊ីល ពិតជាធ្វើបានល្អមែនទែន ដោយបញ្ចប់ការប្រកួត ៩០ នាទីពេញ ពួកគេបានទទួលជ័យជម្នះទៅលើក្រុម ប៉ារ៉ាហ្គាយ យ៉ាងចាស់ដៃក្នុងលទ្ធផល ៤ ទល់នឹង ១។

ក្នុងនោះ ៤ គ្រាប់របស់ ប្រេស៊ីល គឺរកបានដោយ Vinicius Jr. ២ គ្រាប់ គឺនៅនាទីទី ៣៥ និង ៤៥+៥ និង ២ គ្រាប់ទៀត គឺរកបានដោយកីឡាករវ័យក្មេង Savio នៅនាទីទី ៤៣ និង Lucas Paqueta នៅនាទីទី ៦៥ តាមរយៈបាល់ពិន័យ ១១ ម៉ែត្រ ចំណែក ១ គ្រាប់របស់ ប៉ារ៉ាហ្គាយ វិញគឺរកបានដោយកីឡាករ Omar Alderete នៅនាទីទី ៤៨។

គួរបញ្ជាក់ថា ប្រកួតបន្ទាប់ ដែលជាការប្រកួតចុងក្រោយនៃវគ្គជម្រុះក្នុងពូល ប្រេស៊ីល នឹងត្រូវជួបជាមួយក្រុមកំពូលតារាង កូឡុំប៊ី នៅថ្ងៃទី ៣ ខែ កក្កដា ខាងមុខ៕

សូមទស្សនាវីដេអូខាងក្រោម៖