Neymar បានចុចឈ្មោះអតីតខ្សែការពារនៅ PL រូបនេះ ថាជាគូប្រជែងដ៏តឹងតែងនៅលើទីលានបំផុតរបស់ខ្លួន

បរទេស៖ ថ្លែងនៅក្នុងកិច្ចសម្ភាសន៍ជាមួយ VIVA Sport ខ្សែប្រយុទ្ធ Neymar Jr. របស់ក្រុម Al-Hilal បានចុចឈ្មោះយកអតីតខ្សែការពារ Chelsea និងជាមិត្តរួមសញ្ជាតិរបស់ខ្លួន កីឡាករ Thiago Silva ថាជាដៃគូដ៏តឹងតែងរបស់គេបំផុតនៅលើទីលាន។

ជាការពិតណាស់ Neymar និង Silva គឺធ្លាប់ជាមិត្តរួមក្រុមនឹងគ្នាទាំងនៅក្រុមជម្រើសជាតិប្រេស៊ីល និងពេលនៅក្រុម Paris Saint-Germain ប៉ុន្តែអ្នកទាំងពីរក៏ធ្លាប់ក្លាយជាគូប្រជែងលេងទល់មុខគ្នាផងដែរ នៅពេលដែល Neymar លេងនៅ Barcelona និង Silva លេងនៅ PSG។

គួរដឹងថា Silva គឺជាខ្សែការពារដ៏ឆ្នើមបំផុតម្នាក់ក្នុងលោក ហើយគាត់គឺធ្លាប់លេងនៅក្លិបធំៗមួយចំនួនដូចជា AC Milan, PSG និង Chelsea ជាដើម ប៉ុន្តែនៅដំណាច់រដូវកាលនេះ គាត់បានចាកចេញពីទ្រនំចាស់ Chelsea ហើយ ដោយបានផ្លាស់ទៅចូលរួមជាមួយក្លិប Fluminense នៅប្រទេស ប្រេស៊ីល៕

ប្រភព៖ Sportskeeda