យប់មិញក្រុមក៏ចាញ់ ចំណែក Ronaldo ថែមទាំងបានសាងកំណត់ត្រាដ៏អាក្រក់មិនធ្លាប់មានមួយនេះទៀតនៅក្នុងអាជីព

បរទេស៖ ប្រធានក្រុមរបស់ក្រុមជម្រើសជាតិ ព័រទុយហ្គាល់ កីឡាករ Cristiano Ronaldo បានសាងកំណត់ត្រាដ៏ក្រក់មិនធ្លាប់មានមួយនៅក្នុងអាជីព ក្រោយបញ្ចប់ការប្រកួតទល់នឹងក្រុម ហ្សកហ្ស៊ី ដែលជាការប្រកួតចុងក្រោយនៃវគ្គជម្រុះក្នុងពូលនៅក្នុងពានរង្វាន់ Euro ២០២៤ យប់មិញ។

ជាការពិតណាស់ នៅក្នុងការប្រកួតជុំទី ៣ ក្នុងពូល F នៃពានរង្វាន់ Euro ២០២៤ កាលពីយប់មិញនេះត្រូវនឹងថ្ងៃទី ២៦ ខែ មិថុនា ឆ្នាំ ២០២៤ ក្រុមបញ្ចខែល ព័រទុយហ្គាល់ បានបរាជ័យក្រោមថ្វីជើងក្រុម ហ្សកហ្ស៊ី ក្នុងលទ្ធផល ២ ទល់នឹង ០។

ប៉ុន្តែទោះបីជាយ៉ាងណាក៏ដោយ ក្រុមព័រទុយហ្គាល់ឥឡូវនេះបានកក់កៅអីឡើងទៅកាន់វគ្គ ១៦ ក្រុមចុងក្រោយជាផ្លូវការហើយ ដោយទទួលបានចំណាត់ថ្នាក់ឈរនៅកំពូលតារាងប្រចាំពូល F មាន ៦ ពិន្ទុក្នុងដៃ។

ក្រឡេកទៅកាន់ Ronaldo វិញ ទោះបីនៅក្នុងព្រឹត្តិការណ៍នេះគាត់បានជួយក្រុមឡើងទៅកាន់វគ្គបន្តក៏ពិតមែន ប៉ុន្តែបន្ទាប់ពីបញ្ចប់ការប្រកួតទាំងអស់នៅក្នុងពូល គាត់បានសាងកំណត់ត្រាមិនល្អមួយនៅក្នុងអាជីព ដោយនេះគឺជាលើកដំបូងហើយ ដែលនៅក្នុងការប្រកួតវគ្គជម្រុះក្នុងពូលនៃពានរង្វាន់ធំបែបនេះ គាត់មិនអាចរកបានគ្រាប់បាល់បានសូម្បីតែមួយគ្រាប់៕

ប្រភព៖ Sportskeeda