អីយ៉ាស់! កីឡាករក៏ចង់មក ក្លិបក៏ចង់បាន ឥឡូវនេះ Man UTD កំពុងតែចរចាយ៉ាងរលូនក្នុងការផ្ទេរយកខ្សែការពារលំដាប់រូបនេះ

បរទេស៖ ក្លិបបិសាចក្រហម Manchester United ត្រូវបានគេរាយការណ៍ថា កំពុងតែដំណើរការយ៉ាងរលូនក្នុងការចរចាយកខ្សែការពារ Matthijs de Ligt របស់ Bayern Munich មកកាន់ទឹកដី Old Trafford។

យោងតាមការចុះផ្សាយដោយកាសែត អ៊ីតាលី លោក Fabrizio Romano បានឱ្យដឹងថា De Ligt ឥឡូវនេះកំពុងទទួលបានភ្លើងខៀវក្នុងការផ្ទេរដ៏មានសក្តានុពលទៅកាន់ Man UTD។

ប្រភពដដែលបានបន្ថែមថា De Ligt បច្ចុប្បន្នគឺពេញចិត្តចំពោះគម្រោងរបស់ Man UTD ខ្លាំងណាស់ ទោះបីជាពួកគេមិនមានកៅអីលេងពារង្វាន់ Champions League នៅរដូវកាលខាងមុខក្តី។

ការចរចាចំពោះលក្ខខណ្ឌផ្ទាល់ខ្លួនកំពុងតែដំណើរការយ៉ាងរលូន ដោយនៅពេលនេះគឺមិនមានបញ្ហាអ្វីរាំងស្ទះនោះឡើយ ខណៈ De Ligt ផ្ទាល់រូបគេក៏បានបើកចិត្តក្នុងការចង់មកចូលរួមជាមួយ Man UTD ផងដែរ។

គ្រប់យ៉ាងក្នុងពេលឥឡូវនេះ គឺនៅសល់តែការចរចារវាងក្លិប និងក្លិបប៉ុណ្ណោះ ដោយ Bayern ទាមទារតម្លៃផ្ទេរចំពោះខ្សែការពារសញ្ជាតិ ហូល្លង់ វ័យ ២៤ ឆ្នាំរូបនេះចំនួន ៥០ លានអឺរ៉ូ ឬប្រមាណជា (៥៣ លានដុល្លារអាមេរិក) ប៉៉ុន្តែ Man UTD កំពុងតែព្យាយាមឱ្យពួកគេបញ្ចុះតម្លៃជាងនេះបន្តិចទៀត៕

ប្រភព៖ Fabrizio Romano