រំភើបណាស់ លី មួយលាង ម្ចាស់មកុដ Miss Teen International ទទួលរង្វាន់លុយសុទ្ធ និងឡានទំនើប

កម្សាន្ត ៖ កាលពីប្រមាណ ២ខែមុន យុវតីកម្ពុជា កញ្ញាលី មួយលាង បានធ្វើឲ្យកក្រើកវិស័យបវរកញ្ញាកម្ពុជា ក្រោយទទួលបានចំណាត់ថ្នាក់លេខ១ ជាម្ចាស់មកុដ Miss Teen International ប្រចាំឆ្នាំ ២០២៤ ពេលទៅប្រកួតនៅឥណ្ឌា ជាមួយយុវតីបរទេសប្រមាណជាង ២០ប្រទេសទៀត។

សមិទ្ធផលមួយនេះ ធ្វើឲ្យ មួយលាង ស្ថិតនៅក្នុងក្រសែភ្នែកហ្វេនៗ ដោយទទួលបានការងារថតកុន និងប្រម៉ូតផលិតផលជាហូរហែ។

យើងសង្កេតឃើញថា កាលពីយប់មិញ ខណៈពេលដែល មួយលាង កំពុងធ្វើជា MC នៅក្នុងកម្មវិធី ការប្រកួតបរវកញ្ញា Mini Miss Cambodia 2024, Little Miss Cambodia 2024, Miss Preteen Cambodia 2024 វគ្គបង្ហាញខ្លួនដំបូង នាងក៏ត្រូវបានប្រកាសថា ទទួលបានប្រាក់រង្វាន់ ៥ម៉ឺនដុល្លារ និងរថយន្តមួយគ្រឿងដែលមានតម្លៃ ៥ម៉ឺនដុល្លារទៀត ដែលជារង្វាន់ពីស្ថាប័ន Miss Teen International ផ្ទាល់តែម្ដង។ 

តាមរយៈរូបភាពខាងក្រោម បានបង្ហាញថា មួយលាង ពិតជារំភើប និង​រីករាយយ៉ាងខ្លាំង ជាមួយរង្វាន់ដែលនាងទទួលបានពីការខិតខំប្រឹងប្រែង និងសមត្ថភាពពិតៗរបស់នាង។