ល្អពេក! អ្នកគាំទ្រ Man UTD ទទូចចង់ឱ្យគ្រូបង្វឹកថ្មីលោក Amorim នាំយកកូនក្រុមនៅ Sporting ដែលក្រឡុក Man City យប់មិញមកតាមខ្លួនដែរ

បរទេស៖ អ្នកគាំទ្រ Manchester United បានទទូចចង់ឱ្យចង់ឱ្យគ្រូបង្វឹកថ្មីលោក Ruben Amorim ចុះកុងត្រានាំយកកីឡាករពី Sporting CP ម្នាក់មកកាន់ទឹកដី Old Trafford ប៉ុន្តែម្នាក់នោះមិនមែនជាខ្សែប្រយុទ្ធ Viktor Gyokeres ដែលស៊ុត hat-trick ទល់នឹង Manchester City នៅក្នុងការប្រកួតពានរង្វាន់ Champions League នាយប់រំលងអាធ្រាត្រឈានចូលថ្ងៃទី ០៦ ខែ តុលានេះនោះទេ។

ជាការពិតណាស់ លោក Amorim យប់មិញនេះបានដឹកនាំក្រុម Sporting ជាលើកចុងក្រោយ មុនលោកផ្លាស់មកកាន់ការងារនៅ Man UTD នៅរដូវកាលនេះ ខណៈនៅក្នុងការប្រកួតចុងក្រោយរបស់លោក លោកពិតជាធ្វើបានល្អខ្លាំងណាស់ ដោយបានដឹកនាំក្រុមជើងឯកលីគព័រទុយហ្គាល់យកឈ្នះលើក្រុមខ្លាំង Man City ៤ ទល់នឹង ១។

យ៉ាងណាមិញ ក្រោយការប្រកួតនេះបានបញ្ចប់ អ្នកគាំទ្រមិនត្រឹមតែចាប់អារម្មណ៍ខ្លាំងលើលោក Amorim ប៉ុណ្ណោះទេ ជាមួយគ្នានេះខ្សែប្រយុទ្ធសញ្ជាតិ ស៊ុយអ៊ែត Viktor Gyokeres ក៏ត្រូវបានគេចាប់អារម្មណ៍ខ្លាំងផងដែរ ដោយសារតែរូបគេបានបង្ហាញគុណភាពបញ្ចប់ទីយ៉ាងអស្ចារ្យ ដោយបានស៊ុតបញ្ចូលទី ៣ គ្រាប់ម្នាក់ឯងទល់នឹងក្រុមមេឃខៀវ។

ទោះបីជាយ៉ាងណាក៏ដោយ អ្នកគាំទ្រ Man UTD មួយភាគធំហាក់មិនសូវចាប់អារម្មណ៍លើ Viktor Gyokeres ប៉ុន្មានទេ ប៉ុន្តែផ្ទុយទៅវិញ ពួកគេហាក់ពេញចិត្តលើខ្សែបម្រើម្ចាស់អាវលេខ ៤២ Morten Hjulmand ជាង ដោយពួកគេបានទទូចចង់ឱ្យគ្រូបង្វឹកសញ្ជាតិ ព័រទុយហ្គាល់ វ័យ ៣៩ ឆ្នាំចុះកុងត្រាយកខ្សែបម្រើសញ្ជាតិ ដាណឺម៉ាក រូបនេះមកកាន់ទីក្រុង Manchester ជាមួយលោកដែរ៕

ប្រភព៖ Sportbible