ច្បាស់ដូចថ្ងៃ! Raphinha ស៊ុតមួយជើងពីលើដំបូលទូកចូលមុំ ៩០ ល្អដូចផ្កា ជួយឱ្យ Barca លត់ Crvena Zvezda ៥-២(មានវីដេអូ)

បរទេស៖ នាយប់រំលងអាធ្រាត្រឈានចូលថ្ងៃទី ០៧ ខែ វិច្ឆិកា ឆ្នាំ ២០២៤ នេះ ក្រុមផ្កាយក្រហម Crvena Zvezda របស់ ស៊ែប៊ីបានបើកទ្វាកីឡដ្ឋាន Red Star របស់ខ្លួន ទទួលស្វាគមន៍ក្រុមភ្ញៀវ Barcelona នៅក្នុងការប្រកួតពានរង្វាន់ Champions League។

ជាការពិតណាស់ នៅក្នុងការប្រកួតនោះ ខាងក្រុមភ្ញៀវ Barcelona ពិតជាធ្វើបានល្អមែនទែន ដោយបញ្ចប់ការប្រកួត ៩០ នាទីពេញ ពួកគេបានទទួលជ័យជម្នះទៅលើក្រុម Crvena Zvezda ក្នុងលទ្ធផលយ៉ាងចាស់ដៃ ៥ ទល់នឹង ២។

ក្នុងនោះខាងក្រុម ៥ គ្រាប់របស់ Barcelona គឺរកបានដោយខ្សែការពារ Inigo Martinez នៅនាទីទី ១៣, Robert Lewandowski រកបាន ២ គ្រាប់នៅនាទីទី ៤៣ និង ៥៣ និង ២ គ្រាប់ទៀតរកបានដោយ Raphinha នៅនាទីទី ៥៥ និង Fermin Lopez នៅនាទីទី ៧៦។ ចំណែក ២ គ្រាប់របស់ Crvena Zvezda វិញគឺរកបានដោយកីឡាករ Silas នៅនាទីទី ២៧ និង Milson នៅនាទីទី ៨៤។

គួរបញ្ជាក់ថា ក្រោយជ័យជម្នះនេះ បានធ្វើឱ្យ Barcelona ហក់ឡើងមកឈរនៅលេខរៀងទី ៦ នៃតារាងចំណាត់ថ្នាក់របស់ UCL ហើយ ក្រោយឆ្លងកាត់ ៤ ប្រកួត ពួកគេឈ្នះ ៣ និងចាញ់ ១ មាន ៩ ពិន្ទុ ដោយឡែក Crvena Zvezda វិញ កំពុងឈរនៅលេខរៀងទី ៣៥ ក្បែរបាតតារាង ក្រោយឆ្លងកាត់ ៤ ប្រកួតដូចគ្នា ពួកគេចាញ់ទាំង ៤ មិនទាន់មានពិន្ទុរាប់នោះទេ។

សូមទស្សនាវីដេអូខាងក្រោម៖