គ្រូពេញចិត្តគេណាស់! លោក Amorim សម្លឹងឃើញខ្សែបម្រើវ័យក្មេងកំពុងលេចធ្លោររូបនេះ មកជំនួស Casemiro

បរទេស៖ លោក Ruben Amorim ត្រូវបានគេរាយការណ៍ថា កំពុងចាប់អារម្មណ៍ចង់នាំយកអតីតខ្សែបម្រើរបស់ Manchester United កីឡាករ Angel Gomes ត្រឡប់មកកាន់ទឹកដី Old Trafford វិញ។

Angel Gomes បច្ចុប្បន្នគឺជាកីឡាកររបស់ក្លិប Lille នៃលីគកំពូល បារាំង ប៉ុន្តែមុនពេលខ្សែបម្រើសញ្ជាតិ អង់គ្លេស វ័យ ២៤ ឆ្នាំរូបនេះផ្លាស់ទៅកាន់ទីនោះនៅក្នុងឆ្នាំ ២០២០ រូបគេគឺជាយុវជនថ្នាលរបស់ក្រុមបិសាចក្រហម។ 

Angel Gomes បានបង្ហាញខ្លួនឱ្យ Lille បានចំនួន ១២៩ ដង ហើយថ្មីៗនេះរូបគេក៏ត្រូវបានគ្រូបង្វឹកបណ្តោះអាសន្ន Lee Carsley កោះហៅចូលក្នុងក្រុមជម្រើសជាតិ អង់គ្លេស ផងដែរ។

យោងតាមការចុះផ្សាយដោយកាសែត The Sun បានឱ្យដឹងថា គ្រូបង្វឹកថ្មីរបស់ Man UTD លោក Amorim កំពុងដាក់ក្រសែភ្នែក និងចាប់អារម្មណ៍លើ Angel Gomes មែនទែន ហើយលោកទំនងជាអាចចុះកុងត្រាយករូបគេមកកាន់ទឹកដី Old Trafford វិញនៅរដូវកាលក្រោយ។

ប្រភពដដែលបានបន្ថែមថា លោក Amorim នឹងជជែកអំពីរឿងនេះជាមួយថ្នាក់លើក្លិបនៅខែ មករា ខាងមុខ ដោយលោកជឿជាក់ថា Gomes គឺជាជម្រើសដ៏សក្តិសមបំផុត ដើម្បីមកជំនួសកន្លែង Casemiro ដែលនឹងផុតកំណត់កិច្ចសន្យាជាមួយក្លិបនៅខែ មិថុនា ឆ្នាំ ២០២៦ ក្នុងរយៈពេលវែង។

គួរបញ្ជាក់ថា Angel Gomes នឹងផុតអស់សុពលភាពកុងត្រាជាមួយ Lille នៅដំណាច់រដូវកាលនេះហើយ ពោលគឺត្រឹមខែ មិថុនា ឆ្នាំ ២០២៥៕

ប្រភព៖ talkSPORT