ទំនងតើ! ក្រោយបរាជ័យយក Davies ឥឡូវ R.Madrid បង្វែរចិត្តមកតាមយកតារាឆ្នើមរបស់ Bayern រូបនេះវិញម្តង

បរទេស៖ យោងតាមរបាយការណ៍ ដែលចុះផ្សាយដោយអ្នកកាសែតលោក Christian Falk បានឱ្យដឹងថា ខ្សែបម្រើ និងជាខ្សែការពារស្លាបស្តាំរបស់ Bayern Munich កីឡាករ Joshua Kimmich កំពុងស្ថិតនៅក្នុងការចរចាជាមួយ Real Madrid ជុំវិញការផ្ទេរដ៏មានសក្តានុពលមួយ។

ជាការពិតណាស់ Kimmich នឹងចាកចេញពី Bayern Munich នៅដំណាច់រដូវកាលនេះហើយ ក្រោយកិច្ចសន្យារបស់គេផុតសុពលភាព ខណៈបច្ចុប្បន្នក្លិបអធិរាជស Real Madrid ត្រូវបានគេមើលឃើញថា គឺជាជម្រើសដ៏ល្អបំផុតមួយសម្រាប់អាជីពបន្ទាប់របស់គាត់។

ទោះបីជាយ៉ាងណាក៏ដោយ Bayern គឺពុំទាន់ចង់ឱ្យ Kimmich ចាកចេញនៅរដូវកាលក្រោយនោះទេ ដោយពួកគេគ្រោងនឹងផ្តល់ជម្រើសដ៏សក្តិសមមួយ ដើម្បីបន្តកិច្ចសន្យាជាមួយតារាឆ្នើមវ័យ ២៩ ឆ្នាំរូបនេះបន្តទៀត ប៉ុន្តែនៅក្នុងពេលជាមួយគ្នានេះ R.Madrid ក៏កំពុងចាប់អារម្មណ៍លើរូបគេផងដែរ ដោយឥឡូវនេះក្លិបម្ចាស់ជើងឯក Champions League ១៥ សម័យកំពុងតែបើកកិច្ចចរចា ដើម្បីផ្តល់សំណើសមស្របណាមួយសម្រាប់ខ្សែបម្រើសញ្ជាតិ អាល្លឺម៉ង់ រូបនេះ៕

ប្រភព៖ ONE Football