បរទេស៖ វីរបុរស Barcelona លោក Rivaldo បានជម្រុញឱ្យអតីតក្លិបរបស់ខ្លួនគួរចុះកុងត្រាយកខ្សែប្រយុទ្ធស្លាប Marcus Rashford ពី Manchester United ព្រោះលោកយល់ថា តារាសញ្ជាតិ អង់គ្លេស វ័យ ២៧ ឆ្នាំរូបនេះ នឹងផ្តល់ផលវិជ្ជមានជាច្រើនមកកាន់ក្រុមទាំងមូល។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
ជាការពិតណាស់ អនាគតរបស់ Rashford ជាមួយ Man UTD នាមួយរយៈចុងក្រោយនេះហាក់ពុំសូវល្អប៉ុន្មានទេ ជាពិសេសបន្ទាប់ពីរូបគេមានបញ្ហារកាំរកូសខ្លះៗជាមួយអ្នកចាត់ការថ្មីលោក Ruben Amorim ដោយរូបគេ ត្រូវបានអ្នកចាត់ការសញ្ជាតិ ព័រទុយហ្គាល់ វ័យ ៣៩ ឆ្នាំបញ្ឈរជើងចោលពីការប្រកួតចំនួន ១០ ប្រកួតមកហើយ ខណៈថ្មីៗនេះ មានសេចក្តីរាយការណ៍ពីបរទេសព្រោងព្រៀត ថារូបគេកំពុងមានការចាប់អារម្មណ៍ដោយក្លិប AC Milan និង Barcelona។
ជុំវិញនឹងព័ត៌មាននេះ បានធ្វើឱ្យលោក Rivaldo ហាក់មានការពេញចិត្តជាខ្លាំង ហើយថ្មីៗនេះលោកបានលើកឡើងពីគុណសម្បត្តិ ដែល Barcelona នឹងទទួលបានពីការចុះកុងត្រាយក Rashford យ៉ាងដូច្នេះថា៖
ខ្ញុំគិតថា គាត់នឹងមានកន្លែងលេងនៅក្នុងក្រុមនេះ ព្រោះគាត់មានលក្ខខណ្ឌក្លាយជាកីឡាករដ៏អស្ចារ្យម្នាក់ ហើយ Barca គឺមានកាលវិភាគលេងច្រើន ដែលអាចជួយគាត់ ដើម្បីមានឱកាសលេងបាន។... ការមកដល់របស់កីឡាករ ដូចជា Rashford នឹងអាចផ្តល់នូវឥទ្ធិពលវិជ្ជមាន ព្រោះវានឹងជួយឱ្យគ្រូបង្វឹកអាចកសាងក្រុមដ៏ល្អប្រសើរមួយបាន ហើយវាក៏ផ្តល់នូវជម្រើសបន្ថែម ដើម្បីឱ្យគ្រូបង្វឹកមានការជ្រើសរើសកីឡាករ រវាងជម្រើសទាំងអស់នោះនៅក្នុងទីលានផងដែរ៕
ប្រភព៖ Sportskeeda
Bong I.T