ជម្រើសជាតិកម្ពុជាធ្លាប់មានគ្រាប់ពេជ្រលេងនៅលីគកំពូលអាល្លឺម៉ង់ តែចុងក្រោយគាត់ត្រូវបញ្ចប់អាជីពដោយសារបញ្ហារបួស

បាល់ទាត់៖ ថ្មីៗនេះទំព័រផ្លូវការរបស់លីគកំពូល អាល្លឺម៉ង់ Bundesliga បានគាស់កកាយអតីតកីឡាករជម្រើសជាតិ កម្ពុជា ម្នាក់ ដែលធ្លាប់ប្រកបអាជីពនៅទីនោះជាមួយក្លិប FC Nuremberg ដែលធ្វើឱ្យអ្នកគាំទ្រភាគច្រើនហាក់មានភាពភ្ញាក់ផ្អើលជាខ្លាំង ដោយសារតែវត្តមានរបស់អតីតកីឡាកររូបនោះគឺពុំសូវមានអ្នកបានដឹងនោះទេ។

ត្រួសៗពីប្រវត្តិរបស់អតីតកីឡាកររូបនោះ លោកគឺមានឈ្មោះថា Chhunly Pagenburg បច្ចុប្បន្នមានវ័យ ៣៨ ឆ្នាំ ហើយលោកធ្លាប់លេងតួនាទីជាខ្សែប្រយុទ្ធកណ្តាល មានជំនាញជើងស្តាំ និងមានកម្ពស់ ១.៧៧ ម៉ែត្រ។  

លោក Chhunly គឺជាយុវជនថ្នាលរបស់ក្លិប FC Nuremberg តែម្តង ហើយលោកគឺត្រូវបានតម្លើងមកកាន់ឈុតធំក្នុងឆ្នាំ ២០០៥។ លុះលេងនៅទីនោះបានដល់ឆ្នាំ ២០០៨ លោកក៏បានខ្ចីជើងទៅកាន់ក្រុម 1860 Munich រយៈពេលកន្លះរដូវកាល ហើយបន្ទាប់ពីបញ្ចប់កិច្ចសន្យាខ្ចីជើង លោកបានត្រឡប់មកកាន់ក្លិបចាស់ FC Nuremberg វិញបានកន្លះរដូវកាល ហើយក្រោយមកលេងក៏បានផ្ទេរទៅកាន់ក្លិប Rot-Weib Erfurt, Eintracht Trier និងចុងក្រោយលេងនៅក្លិប FSV Frankfurt បាន ១ រដូវកាលកន្លះ លោកក៏បានសម្រេចចិត្តចូលនិវត្តន៍ពីបាល់ទាត់នៅឆ្នាំ ២០១៥ ត្រឹមវ័យ ២៨ ឆ្នាំ ដោយសារតែលោកមានរបួសរ៉ាំរ៉ៃខ្លាំងពេក។

ខណៈនៅក្នុងអាជីពរបស់លោក លោកគ៏ធ្លាប់បានឈ្នះពាន ៣ ផងដែរ ដូចជា German Cup ១លើក, Thuringia Cup ១ លើក និង Rhineland Cup ១ លើក។

ក្រឡេកមកកាន់ក្រុមជម្រើសជាតិវិញ លោកធ្លាប់បានជាប់នៅឈុត U-១៩ និង U-២០ របស់ក្រុមជម្រើសជាតិ អាល្លឺម៉ង់ ប៉ុន្តែនៅពេលជ្រើសរើសលេងតំណាងឱ្យក្រុមជម្រើសជាតិឈុតធំ លោកបានសម្រេចចិត្តលេងឱ្យជម្រើសជាតិ កម្ពុជា វិញ។ ប៉ុន្តែលោកលេងបានតែ ៣ ប្រកួតប៉ុណ្ណោះ ដោយលេងបាន ២ ប្រកួតលក្ខណៈមិត្តភាពនៅក្នុងឈុត U-២៣  និងលេងផ្លូវការជាមួយឈុតធំបាន ១ ប្រកួតនៅក្នុងឆ្នាំ ២០១៣។

គួរបញ្ជាក់ថា លោក Chhunly គឺជាកូនកាត់ខ្មែរ-អាល្លឺម៉ង់ ដោយលោកមានម្តាយជាជនជាតិខ្មែរ និងឪពុកជាជនជាតិ អាល្លឺម៉ង់៕

ដកស្រង់ និងកែសម្រួលអត្ថបទ៖ Keylatop