គ្រូបង្វឹកក្រុមតារាចម្រៀង WayV បានបង្ហោះសារលើបណ្តាញ Instagram ក្នុងបំណងអរគុណសមាជិកក្រុម តែបែរជាធ្វើឲ្យអ្នកគាំទ្រខឹងសម្បាទៅវិញ!

កូរ៉េខាងត្បូង៖ ការរីករាលដាលនៃជំងឺកូរ៉ូណាប្រភេទថ្មី COVID-19 បានក្លាយជាបញ្ហាធំមួយនៅទូទាំងពិភពលោកដែលបានឆក់យកជីវិតមនុស្សជាច្រើន និងបង្កឱ្យមានការរើសអើងជាតិសាសន៍ ជាពិសេសចំពោះប្រជាជនអាស៊ី។

ទាក់ទងជាមួយនឹងបញ្ហានេះ អ្នកគាំទ្រក្រុមតារាចម្រៀងកូរ៉េ តែដើមកំណើតជាជនជាតិចិន WayV បានសម្តែងការមិនសប្បាយចិត្តជាខ្លាំង នៅពេលដែលពួកគេបានឃើញការបង្ហោះមួយនៅលើ Instagram របស់គ្រូបង្វឹកក្រុម WayV ។

តាមពិតទៅ គ្រូបង្វឹករបស់ក្រុម​ WayV មានបំណងថ្លែងអំណរគុណចំពោះក្រុមនេះដែលបានចុះហត្ថលេខានៅលើគម្របអាល់ប៊ុមថ្មី Take Over The Moon សម្រាប់គាត់ តែខ្លឹមសារនៅលើការបង្ហោះនោះ បានធ្វើឲ្យអ្នកគាំទ្រខឹងសម្បាជាខ្លាំង។

គាត់បានបង្ហោះសារជាភាសាកូរ៉េ ដោយមានន័យជាភាសាខ្មែរថា "សូម្បីតែជំងឺកូរ៉ូណា ក៏មិនអាចបញ្ឈប់ពួកគេបានឡើយ" គួបផ្សំនឹង Emoji រូបភ្លើង ????

ក្រុមអ្នកគាំទ្រយល់ថាខ្លឹមសារនៃការបង្ហោះនេះ វាមិនត្រឹមតែន័យប៉ះពាល់ដល់វិបត្តិពិភពលោកដែលកំពុងបង្កឡើងដោយវីរុស COVID-19 ប៉ុណ្ណោះទេ តែវាក៏បង្ហាញពីការរើសអើងជាតិសាសន៍ផងដែរ។ ដោយហេតុថាក្រុមនេះជាជនជាតិចិន ការដាក់រូប Emoji អណ្តាតភ្លើង ធ្វើឲ្យមានជំនឿច្រឡំថា ប្រជាជនចិនទាំងអស់ត្រូវបានភ្ជាប់ទៅនឹងវីរុសនេះ ពីព្រោះប្រទេសនេះជាប្រភពដើមនៃវីរុស។

អ្នកគាំទ្រជាច្រើនបានបញ្ចេញមតិយោបល់ និងបង្ហោះលើបណ្តាញសង្គម Twitter របស់ខ្លួនដោយភ្ជាប់ជាមួយនឹង Hashtag #Respect_WayV ក្នុងបំណងបង្ហាញការមិនពេញចិត្តចំពោះគ្រូបង្វឹកក្រុម។ បច្ចុប្បន្នគណនី Instagram របស់គ្រូបង្វឹកក្រុម WayV ត្រូវបានគាត់បិទដំណើរការដោយខ្លួនឯងបាត់ហើយ។ ទាក់ទងនឹងបញ្ហានេះ អ្នកគ្រប់គ្រង LabelV ឬ SM Entertainment មិនទាន់បានចេញមុខបកស្រាយអ្វីឡើយ៕