បើបានមែនកប់ណាស់! Man UTD ត្រៀមលុយ ៥០ លានដើម្បីអន្ទងយកគ្រាប់ពេជ្ររបស់ Wolves ម្នាក់នេះ

អង់គ្លេស៖ ក្លិប Manchester United ត្រូវបានគេរាយការណ៍មកថា កំពុងដាក់សំណើចង់បានខ្សែប្រយុទ្ធ កំពូលក្រឡុក របស់ក្រុម Wolverhampton Wanderers នោះគឺកីឡាករ Pedro Neto។

ជាការពិតណាស់ កីឡាករអន្តរជាតិសញ្ជាតិព័រទុយហ្គាល់រូបនេះគឺជាកីឡាករម្នាក់ដែលអាចលេងក្នុងតំណែងបានច្រើនផងដែរ ប៉ុន្តែជារួមគាត់លេងនៅតំបន់ប្រយុទ្ធស្លាបខាងស្តាំ ដែលតួនាទីនៅក្នុងតំបន់នេះ Man UTD កំពុងត្រូវការខ្លាំងមែនទែន។

យោងតាមសេចក្តីរាយការណ៍របស់សារព័ត៌មាន The Sun បានឱ្យដឹងថា ក្រុមបិសាចក្រហមកំពុងដាក់គោលដៅចង់បានកីឡាករ Neto ខណៈខាងក្រុម Wolves បានដាក់តម្លៃខ្លួនផ្តាច់កុងត្រាចំពោះកីឡាកររូបនេះប្រាមាណជា ៥០ លានផោន ឬ (៦៩ លានដុល្លា)។

យ៉ាងណាមិញ Manchester United ក៏អាចមានជម្រើសច្រើនដែរប្រសិនបើមិនអាចចុះកុងត្រាយកខ្សែប្រយុទ្ធវ័យ ២១ ឆ្នាំរូបនេះបាន ហើយក្នុងនោះក្រុមបិសាចក្រហមក៏មានព័ត៌មានជាច្រើនបានចុះផ្សាយថាក្លិបចង់បាន Jadon Sancho ឬ Jack Grealish។

គួរបញ្ជាក់ដែរថា Neto នៅក្នុងរដូវកាលនេះអាចរកគ្រាប់បាល់បាន ៥ គ្រាប់ និង បញ្ជូនឱ្យមិត្តរួមក្រុមសម្រេចគោលដៅបានចំនួន ៥ លើក ក្រោយការបង្ហាញខ្លួនបាន ២៩ ប្រកួតឱ្យ Wolves៕

បើចង់ឃើញ Neto មានទម្រង់លេងយ៉ាងណានោះសូមទស្សនាវីដេអូខាងក្រោម៖

ប្រភព៖ SportsMole