អ៊េមណាស់! Liverpool ដាក់ផែនការយកអតីតខ្សែការពារ Man City រូបនេះមកជំនួស Arnold

បរទេស៖ យោងតាមសេចក្តីរាយការណ៍របស់សារព័ត៌មាន អាល្លឺម៉ង់ Bild បានឱ្យដឹងថា ក្លិបហង្សក្រហម Liverpool ពួកគេមានចំណាប់អារម្មណ៍ចង់បានអតីតខ្សែការពារយុវជន Manchester City កីឡាករ Jeremie Frimpong មកជំនួសកន្លែង Alexander Arnold ដែលនឹងអស់សុពលភាពកុងត្រានៅដំណាច់រដូវកាល ២០២៤-២០២៥ នេះ។

Jeremie Frimpong គឺជាកីឡាករបាល់ទាត់ម្នាក់ ដែលបានដុះចេញពីថ្នាលយុវជន Man City ហើយនៅឆ្នាំ ២០១៩ រូបគេក៏បានផ្លាស់ទៅកាន់ក្រុមឈុតធំ Celtic និងបច្ចប្បន្ននេះកំពុងលេងនៅ Bayer Leverkusen ហើយរូបគេកំពុងក្លាយជាកម្លាំងស្នូលដ៏សំខាន់របស់ក្រុមម្ចាស់ជើងឯក Bundesliga មួយនេះ។

ងាកមកកាន់ Arnold វិញ គឺរូបគេនឹងផុតសុពលភាពកុងត្រាជាមួយ Liverpool នៅដំណាច់រដូវកាលនេះហើយ បន្ទាប់ពីស្នាក់នៅទីនេះតាំងពីថ្នាលយុវជន រហូតមកដល់បច្ចុប្បន្នរយៈពេល ៩ ឆ្នាំ ពោលគឺតាំងពីឆ្នាំ ២០១៥ មក ខណៈគិតត្រឹមពេលនេះរូបគេក៏ពុំទាន់មានព័ត៌មានលេចណាមួយ ថានឹងបន្តកុងត្រាថ្មីជាមួយក្រុមម្ចាស់ជើងឯក Premier League ១៩ សម័យទៀតដែរ។

ដូច្នេះជំហានដំបូងនេះ Liverpool បានកំណត់មុខសញ្ញាលើ Jeremie Frimpong រួចជាស្រេច ប្រសិនបើ Arnold សម្រេចចិត្តចាកចេញពិតមែន៕

ប្រភព៖ Sportskeeda