មកមែនកប់ហ្មង! លេចឮថាកីឡាករឆ្នើមពីររូបនេះនឹងផ្លាស់មកកាន់បឹងកេតនារដូវកាលថ្មី

កម្ពុជា៖ ខ្សែបម្រើ Mustafa Zazai និង ខ្សែប្រយុទ្ធ Ajayi Opeyemi Korede ត្រូវបានគេរាយការណ៍នឹងចូលរួមជាមួយក្លិប បឹងកេត សម្រាប់រដូវកាលថ្មីខាងមុខនេះ។

ជាការពិតណាស់ ទាំង Zazai និង Ajayi សុទ្ធសឹងតែជាអតីតកីឡាកររបស់វិសាខាកាលពីរដូវកាលមុន ខណៈ អ្នកទាំងពីរក៏បានចែកផ្លូវគ្នាជាមួយក្លិបដូចគ្នានាពេលថ្មីនេះ ខណៈ បច្ចុប្បន្នពួកគេកំពុងសម្រាកលំហែកាយនៅឯប្រទេសថៃ។

បើយោងទៅតាមប្រភពស្និទ្ធស្នាលមួយបានបញ្ជាក់ច្បាស់ៗថា អ្នកទាំងពីរខាងលើ សុទ្ធសឹងតែមានទំនាក់ទំនងក្នុងការផ្ទេរចូលរួមជាមួយបឹងកេតរួចមកហើយកាលពីពេលកន្លងៗទៅ ប៉ុន្តែ ដោយសារមានបញ្ហារាំងស្ទះមួយចំនួន ទើបធ្វើឲ្យពួកគេមិនអាចឈានដល់កិច្ចព្រមព្រៀងជាមួយក្រុមនាគខៀវបាន។ យ៉ាងណាក្តី សម្រាប់រដូវកាលថ្មីខាងមុខនេះ រូបគេទាំងពីរត្រូវបានគេទម្លាយឲ្យដឹងថា នឹងចូលរួមជាមួយបឹងកេត ដើម្បីជំនួសកីឡាករបរទេសមួយចំនួនដែលក្លិបទើបនឹងប្រកាសចែកផ្លូវដូចជា Mothusi Gopane, Mizuno Hikaru និង Kenta Yamazaki៕