ដល់ពេលគ្រូ Amorim យកសិស្សនៅក្លិបចាស់មកជួយហើយ! ស្ងាត់ៗខ្សែប្រយុទ្ធ Sporting រូបនេះ បានព្រមព្រៀងលក្ខខណ្ឌផ្លាស់មក Man UTD

បរទេស៖ ក្លិបបិសាចក្រហម Manchester United កំពុងកៀកក្នុងការចុះកុងត្រាយកបានកីឡាករដំបូងសម្រាប់រដូវក្តៅខាងមុខ បន្ទាប់ពីមានសេចក្តីរាយការណ៍ពីបរទេសបានចុះផ្សាយថា ខ្សែប្រយុទ្ធស្លាបរបស់ Sporting CP កីឡាករ Geovany Quenda បានព្រមព្រៀងលក្ខខណ្ឌផ្ទាល់មាត់ ដើម្បីផ្លាស់មកកាន់ទឹកដី Old Trafford ហើយ។

យោងតាមការចុះផ្សាយលម្អិតដោយអ្នកកាសែតលោក Ben Jacobs បានឱ្យដឹងថា កីឡាករដែលមានទេពកោសល្យខ្ពស់វ័យ ១៩ ឆ្នាំសញ្ជាតិ ព័រទុយហ្គាល់ រូបនេះនឹងធ្វើដំណើមកកាន់ក្លិបបិសាចក្រហមនៅរដូវកាលខាងមុខ ខណៈអ្នកចាត់ការលោក Ruben Amorim ត្រូវបានគេដឹងថា គឺជាអ្នកនៅពីក្រោយ ដើម្បីជម្រុញលើការផ្ទេរនេះ។

គួរបញ្ជាក់ថា Geovany Quenda និងលោក Amorim គឺធ្លាប់ធ្វើការជាមួយគ្នាម្តងហើយកាលនៅ Sporting ហើយរូបគេក៏ជាកីឡាករម្នាក់ ដែលតែងតែទទួលបានការកោតសរសើរពីអ្នកចាត់ការសញ្ជាតិ ព័រទុយហ្គាល់ វ័យ ៣៩ ឆ្នាំផងដែរ។ យ៉ាងណាមិញ ដ្បិតរូបគេនៅក្មេងក៏ពិតមែន ប៉ុន្តែគេបានបង្ហាញខ្លួនឱ្យ Sporting បាន ៣៨ ប្រកួតមកហើយនៅរដូវកាលនេះ និងរកបាន ២ គ្រាប់ផងដែរ៕

ប្រភព៖ Caughtoffside